“वाहत्या काळानेही बांधून टाकता येत नाहीत, अशी कलाकृती आकाराला येते, तेव्हा त्यामागे अभ्यास असतो; तंत्र असतं; एक ठोस शास्त्र असतं. पण त्याही पलीकडे काहीतरी भक्कम कारण असतं. त्या कारणाशी पोहोचता यायला हवं.” “हे अव्याहत चक्र आहे. नवीन उगवतच राहतं प्रत्येक काळात.” “हे गरजेचं नाहीच की निर्माणाच्या काळात त्याचा उद्देश कळेल किंवा पोहचेल सर्वांपर्यंत, जन्म ते अर्थ यामध्ये कदाचित हजारो वर्षांचं अंतर असेल. या हजारो वर्षांनी एखाद्या अवलियाची वाटच पाहिलेली असते रे, जो जगाला सांगणार असतो, निर्माणामागचा उद्देश !”

१९३१ साली प्रथम प्रकाशित झालेल्या मुसलमानी मुलखातली मुशाफरी या पुस्तकाचं १९५० मध्ये पुनर्मुद्रण झालं. श्री. रा. टिकेकर डिसेंबर १९२८ ते जुलै १९२९ या काळात पाच-सहा महिने पुण्याच्या ‘केसरी’चे प्रवासी प्रतिनिधी म्हणून मुसलमानी मुलखात फिरत होते. या मुशाफरीत समाविष्ट आहेत पेशावर आणि क्वेट्टा; इराकमधील बसरा आणि बगदाद तर इराणमधील आबादान आणि तेहरान. मुसलमानी मुलखातील मुशाफरी केवळ प्रवासवर्णन नसून ऐतिहासिक-सामाजिक दस्तावेजच आहे. आज हे पुस्तक दुर्मीळ आहे. म्हणूनच नवीन आवृत्तीचा प्रपंच.